مجھے واٹس ایپ کردیتی، یاسر حسین کا انوشےاشرف پر طنز

 اداکار یاسر حسین نے غیر ملکی اداکاروں کو ’عالمی کچرا‘ کہنے کے بیان پر وضاحت دیتے ہوئے کہا کہ لوگ ان کی جاری کردہ پوسٹ کو غلط رنگ دیتے ہیں ۔

اداکارہ انوشے اشرف کے بےجا تنقید اور تند و تیز ردعمل پر یاسر نے انوشے پر طنز کرتے ہوئے کہا کہ شہرت کے لیے لوگ کیا کیا کچھ کر لیتے ہیں، انوشے اگر آپ کو میری پوسٹ سے اتنا مسئلہ تھا تو آپ مجھے واٹس ایپ کردیتیں، بلاوجہ بات کا بتنگڑ بنادیا۔

دو روز قبل یاسرحسین کی اسٹوری کا اسکرین شاٹ سامنے آنے پر اداکارہ انوشے اشرف نے لکھا کہ  یاسر یہ ذہن میں رکھیں کہ کوئی کچرا نہیں ہوتا، اور حتیٰ کہ اگر ان کا کام پسند کرنے کے قابل نہیں تو بھی دنیا بھر سے اداکاروں کی عزت کی جانی چاہیے ۔

باہمی عزت دینے پر زور دیتے ہوئے ان کا مزید کہنا تھا کہ دنیا بھر سے ہر کسی کی اپنی کوشش ہے ، یہ کہا جاسکتا ہے کہ اگر سیریز میں سے کوئی ایک چیز بھی آنکھیں کھول سکتی ہے تو ارطغرل کچرے سے بہت دور ہے ۔

اپنی دیگر انسٹا اسٹوری میں بھی ساتھی اداکاروں اور سستی شہرت کے خواہاں لوگوں کیلئے مختلف دعائیں بھی شیئر کیں۔

 

اس سے قبل اپنی انسٹااسٹوری پر اداکار یاسر حسین نے کہا کہ وہ تمام اداکاروں کی عزت کرتے ہیں چاہے وہ ملکی ہوں یا غیر ملکی میری ہر بات کو ترکش ڈراموں کی کاسٹ سے مت جوڑیں۔

یاسر حسین نے کہا کہ میں نے کبھی بھی کسی کی تذلیل کرنے کی کوشش نہیں کی ہے اور اگر کوئی فرد ان کی باتوں کو غلط رنگ دیتا ہے تو وہ اس کی اپنی سوچ ہو سکتی ہے جس کے لیے وہ سوائے دعا کے کچھ نہیں کرسکتے۔

خیال رہے کہ یاسر حسین نے انسٹاگرام پر اپنی اسٹوری میں تُرک سیریز (ارطغرل غازی) کے کرداروں سے مماثل نوجوانوں کی تصویر شیئر کرتے ہوئے لکھا کہ ان کو کوئی نہیں پوچھے گا کیونکہ گھر کی مرغی دال برابر اور باہر کا کچرا بھی مال برابر۔